पाल्पा , रामपुरमा जारी जिल्ला स्तरीय पुरुष भलिबल प्रतियोगितामा स्याङ्जाले विजयी यात्रा सुरु गरेको छ । प्रतियोगिताको पहिलो खेलमा नवलपुरलाई ...
तेस्रो रामपुर महोत्सव तथा व्यापार मेलाको अवसरमा महोत्सव स्थल रामतुलसी नमुना माविको खेल मैदानमा भएको प्रतियोगितामा पहिलो सेट नवलपुरले २५–२१ अंक सहित आफ्नो पक्षमा लिन सफल भयो । त्यस्त पश्चात स्याङ्जाले लगातार दोस्रो, तेस्रो र चौथो सेट क्रमश २५–१७, २६–२४ र २५–१४ अंक सहित जित निकाल्न सफल भयो ।
समुह ए तर्फको पहिलो खेलमा स्याङ्जाका सन्तोष थापा प्लेयर अफ दि म्याच घोषित भएका छन् । यस जितसँगै स्याङ्जाले ३ अंक र नवलपुरले १ अंक जोडेको छ । प्रतियोगितामा आज ३ खेल हुनेछ । पहिलो खेलमा स्याङ्जा र तनहुँ, दोस्रो खेल पाल्पा र गुल्मी तथा तेस्रो खेल स्याङ्जा र कपिलवस्तु विच हुनेछ ।
प्रतियोगितामा १० जिल्लाको सहभागीता रहने भनिए पनि अन्तमा आएर ७ जिल्लाले सहभागिता जनाएका छन् । माघ २७ देखि फागुन ८ सम्म स१चालन भैरहेको महोत्सवमा जिल्ला भलिबल संघ पाल्पाको आयोजना, नगर खेलकुद विकास समिति रामपुरको सहआयोजना, रामपुर भलिबल संघको व्यवस्थापन र रामपुर उद्योग वाणिज्य संघको मुख्य प्रयोजकमा प्रतियोगिता भएको हो ।
प्रतियोगिताको उपाधि विजेताले नगद १ लाख ५१ हजार १ सय ११ रुपैयाँ सहित कप मेडल र प्रमाणपत्र प्राप्त गर्नेछ । त्यस्तै प्रतियोगितामा दोस्रो हुनेले नगद १ लाख १ हजार १ सय ११ रुपैयाँ सहित कप मेडल र प्रमाणपत्र र तेस्रो हुनेले नगद ५१ हजार १ सय ११ रुपैयाँ सहित कप मेडल र प्रमाणपत्र प्राप्त गर्नेछ । विधागततर्फ उत्कृष्ट हुनेलाई जनही ५ हजार र हरेक खेलको प्लेयर अफ दी म्याचलाई १ हजार रुपैयाँ नगद पुरस्कार प्रदान गरिनेछ ।
