सुनिल न्यौपाने,स्याङ्जा - चापाकोट नगरपालिकाको १६ औं नगर सभा सम्पन्न भएको छ । सो सभामा जनप्रतिनिधिहरूले जनताका हरेक समस्यामा सधैं एकजुट हुन...
समृद्धिको यात्रामा अघि बढ्दै गरेको चापाकोट नगरपालिकाको विरुद्धमा आउने सबै किसिमका समस्यामा सधैं एकजुट हुने जनप्रतिनिधिहरुले प्रतिवद्धता जनाएका हुन् । चापाकोट नगरपालिकाका नगर प्रमुख प्रमुख देब बहादुर खाणको अध्यक्षतामा भएको नगर सभामा उपप्रमुख इशा रानाले स्वागत मन्तव्य राखेकी थिइन् ।
यसै अवसरमा १० वटै वडाका वडाअध्यक्षहरु क्रमशः भुपराज वस्ती,टिकाराम श्रेष्ठ (मोहन), जुट बहादुर राना, नगर प्रवक्ता समेत रहेका अर्जुन खाण, बलनारायण मानन्धर, तारादेवी पोख्रेल, मोहन के.सी, टोपलाल न्यौपाने(राजु), कृष्ण प्रसाद सुवेदी र रामु कोइराला क्रमैसँगले आ—आफ्नो धारणा राखेका थिए ।
हिउँदे अधिवेशनका रुपमा हेर्न सकिने नगर सभामा नगरपालिकामा रहेका दशवटै वडाका वडाअध्यक्षहरुले वडाको बजेट संशोधन सहित विकासको अवस्था, बजेटको खर्च विवरण, कार्यक्रमको उपलब्धि, गुनासा साथै काम गर्दाको समस्या सहितको मन्तव्य राखेका थिए । नगर सभालाई सम्बोधन गर्दै चापाकोट नगरपालिकाका नगर प्रमुख देब बहादुर खाणले पछिल्लो समय तथ्य कुरा नबुझी जनप्रतिनिधिका विरुद्धमा केही व्यक्ति एवं समूहबाट सामाजिक सञ्जालहरुमा आएका अभिव्यक्ति गलत भएको बताएका थिए ।
नगर प्रमुख खाणले समृद्धिसँग जोडिएको चापाकोट नगरपालिकासँग सम्बन्धित विकास निर्माण सहितका हरेक योजनाका विषयमा सूक्ष्म रुपमा अध्ययन गरेर मात्र सकारात्मक एवं रचनात्मक सुझाव राख्न आम नगरवासीलाई अपिल गरे ।
स्थानीय तहले आर्थिक वर्षको सुरुवातमा बजेट, नीति तथा कार्यक्रम प्रस्तुत गरेको ६महिना भित्र अर्को नगरसभा गर्नुपर्ने व्यवस्था भए अनुसार कार्यक्रम आयोजना गरिएको नगर सभाका सचिव समेत रहेका चापाकोट नगरपालिकाका प्रमुख प्रशासकीय अधिकृत रमेश गौतमले जानकारी दिए । सोही अनुरुपको नगर सभामा यस अघि विनियोजित बजेटमा केही हेरफेर साथै सम्पन्न कामको समीक्षा भएको प्रमुख प्रशासकीय अधिकृत गौतमले बताए ।
