पाल्पा, बगनासकाली — पाल्पा जिल्लाको बगनासकाली गाउँपालिका–४, खानीछाँपस्थित बेलडाँडामा आइतबार राति जिप दुर्घटना हुँदा एक किशोरीको ज्यान गएको ...
पाल्पा, बगनासकाली — पाल्पा जिल्लाको बगनासकाली गाउँपालिका–४, खानीछाँपस्थित बेलडाँडामा आइतबार राति जिप दुर्घटना हुँदा एक किशोरीको ज्यान गएको छ भने पाँच जना यात्रु घाइते भएका छन्।
तानसेनबाट चापपानी खहरेखोला हुँदै खानीछाँप जाँदै गरेको लु १ ज १७२४ नम्बरको जिप बेलुकी करिब ८ बजेतिर दुर्घटनामा परेको हो। कालीगण्डकी गाउँपालिका–३ वैघाकी १७ वर्षीया एलिजा सारुको घटनास्थलमै मृत्यु भएको जिल्ला प्रहरी कार्यालय पाल्पाले जनाएको छ। प्रारम्भिक अनुसन्धान अनुसार, ब्रेक फेल भएपछि जिप सडकमै पल्टिएको र त्यसक्रममा च्यापिएर सारुको मृत्यु भएको बताइएको छ।
दुर्घटनामा अन्य पाँच यात्रु घाइते भएका छन्। तीमध्ये एक जनाको टाउकोमा गम्भीर चोट लागेको छ भने बाँकीको अवस्था सामान्य रहेको प्रहरीले जनाएको छ। सबै घाइतेको उपचारका लागि तानसेनस्थित अस्पतालमा पठाइएको छ।
दुर्घटनाका सम्बन्धमा थप अनुसन्धान भइरहेको प्रहरी नायब उपरीक्षक (डीएसपी) सुनिल मल्लले जानकारी दिनुभयो।
